وكانت الكريزة بطلة الفيلم

ببص لورا وببتسم...ببتسم على مواقف عدت ومفكرتش إنها حتكون مهمة في يوم من الأيام، زي اليوم اللي أكلت كريز كتير وانا مستنية عربية اختي تتنضف، أو كمية الضحك اللي ضحكته يوميها، وخصوصاً لما كنت واقفة ملتزمة بإشارة مرور مش شغالة ومصرة إني مش حتحرك إلا لما النور يبقى أخضر. دي مواقف كلها دلوقتي ليها معني وبتخليني ابتسم...بتأكدلي إن كل حاجة بتحصل في إطار خطة كونية ما مش عارفاها، خطة بتخلي كل يوم مغامرة حلوة وغامضة...النهاردة أنا سعيدة بحاجات عدت وماكنش ليها معنى أوي، وسعيدة بأيام صعبة عدت وماكنتش فاكرة إنه ممكن يطلع منها حاجة كويسة، وسعيدة إنك مرة قلتلي ماتعدي عليا؟

ممكن تكون موجود على طول؟ وتفضل تضحكني وتاخد بالك مني على طول؟

عن النجوم - وهواك

أنا تعبت من أداء النجومية اللي احنا عايشين فيه من ساعة ما الثورة بدأت الصراحة. حسه إننا بنشتغل في السينما وبدل ما الناس ممثلة الناس "ناشط/ة حقوقية / سياسية / بيتينجانية / شخصية مرموقة ومهمة على تويتر"! حسه إني بتفرج على فيلم كارتون وكل شخصية فيهم بتعمل قائد/ة الثورة. ماهو لو كان ده صحيح ماكانت الثورة حصلت من بدري، ولا إيه؟! مش برده اللي حرك الناس في موضوع خالد سعيد كان مجهول هويتهم ولا نجوم؟ أنا بحترم الناس اللي بتعمل شغل حقيقي مش بتبعبع والسلام بس أرجوكو والنبي اعملوا في صمت والناس ححتكلم عن شغلكوا مش لازم معاه أداء النجوم والتعالي، مش يبقى المجلس العسكري وانتوا دا البني آدم شوية أعصاب!